大阪飛腳、大阪櫻花、神戶勝利船練習場介紹

本人四個月內兩度出訪關西區,5月去過睇櫻花公開練習,9月就去埋睇飛腳同埋勝利船。呢篇文主要介紹飛腳、櫻花、勝利船練習場,以及作出三方比較。

2017-05-18 櫻花練習

櫻花當日09:30公開練習,較左鬧鐘07:30起身。而櫻花訓練場位於大阪西部舞洲人工島,搭地鐵中央線尾站宇宙廣場站 (コスモスクエア)落車,上到地面搭北港觀光巴士3號線前往,下車站就在練習場門口。

09:10去到練習場,當時只見到兩個人坐係場邊觀眾席,差唔多到10點球員入場熱身準備操練,同時觀眾席開始多人,大約60人觀看。

11:30訓練完畢,跟住班球迷去fans service區等球員出黎,fans service區係Nipponham Sakura Ground 龍門後面。行緊去fans service區果陣清武宏嗣去完廁所出黎,係我面前行過,但櫻花官網寫明只可以係fans service區同球員交流,無奈睇住佢返club house。

本人當日搵左山口螢、杉本健勇、水沼宏太影相,簽名拎到10個球員左右。


2017-09-27飛腳練習

練習09:30開始,同club store開門時間一樣,所以當時我先去club store買簽名板,然後去練習場。飛腳練習場同吹田球場毗鄰,一樣都係搭地鐵去千里中央或大日站,轉乘單軌電車在万博紀念公園站落車。惟練習場距離車站較遠,需步行約15至20分鐘。

大約11:00訓練完畢,依例跟住班球迷去吹田球場一角fans service區等待同球員交流機會。肉眼所見球迷人數起碼80人,幾乎將fans service區塞滿。首先見到既係長沢駿,正當我舉起相機同佢影合照既時候,工作人員拍我膊頭話「No picture”!」當下我臉如死灰,本身想搵遠藤保仁﹑今野泰幸﹑長谷川監督等人影合照,球會臨時作出既決定令我失去僅有既合照機會 (因本人未來一段長時間唔會再踏足關西區),最終逆來順受搵十多個球員簽簽名板。

當遠藤保仁幫我簽名既時候,我開Google翻譯同佢講我兩日後生日,原本想佢係簽名板寫祝福字句,但遠藤保仁睇唔明Google式日文,只用日文同我講生日快樂。球員走晒後我出返去搭巴士去JR茨木站,搭東海道本線上京都行清水寺。


2017-09-29 勝利船練習

身為德國隊鐵粉既我當然睇埋勝利船有冇公開練習,出發前個多星期上勝利船官網睇到我生日正日有公開練習,可以近距離一睹普度斯基風采!當日我特地著德國隊tee,帶埋德國隊頸巾同錦旗去練習場等拎普度斯基簽名影合照,另加一句生日祝福。

前往勝利船練習場車程時間長,在新神戶站搭地鐵去西神南站約30分鐘,轉搭46號巴士約20分鐘在ハイテク4番站落車,如果計埋大阪上神戶搭JR時間,全程接近90分鐘!

落左巴士行大約7分鐘到練習場門口,練習開始前上club house 2樓稍作歇息。一個鐘後訓練完畢,渡部博文、渡邊千真等數名本土球員走去fans service區同球迷簽名影相,因為本人冇簽名板或勝利船相關產品,而且唔太認得D球員,故此一邊同佢地握手一邊等普度斯基及夏雲拿出黎。

不過普度斯基及夏雲拿練習完冇去fans service區而直接入club house沖涼,過左一個鐘普度斯基在club house出黎,但佢耍大牌無視球迷直接開車走人!果刻我好憤怒,生日正日普度斯基咁樣向我贈興!其後尼爾頓 (Nilton)取車前同球迷交流,為免兩手空空離開練習場,我放低手上所有德國隊物品同尼爾頓自拍。雖然想等埋夏雲拿,因為要預時間搭車出去三宮食午飯同埋去姫路城,最終放棄。


3隊練習場比較

環境︰

飛腳︰只有幾排四人座椅,周圍多雜草,隔住鐵絲網睇,球員練習位置較遠,廁所亦遠離練習場

櫻花︰木板座椅可容納過百人,觀眾席同球場之間冇鐵絲網阻隔,練習場10米範圍內有兩座廁所

勝利船︰不銹鋼座椅可容納過百人 (同香港街場相若),觀眾席同球場之間有鐵絲網阻隔,club house 有廁所,2樓有位置供球迷休息

交通︰

飛腳︰大阪市中心出發兩程鐵路,惟練習場不靠近鐵路站

櫻花︰大阪市中心出發兩程車,巴士直達練習場門口

勝利船︰新神戶/三宮出發兩程車,若從大阪市中心出發最少花85分鐘

球員交流︰

飛腳︰簽名可以,合照視乎球會臨場決定,到場人數及近期戰績會有機會影響 (當時飛腳連續4場不勝,更輸掉其中3場)

櫻花:︰簽名及合照均可,大部份球員有求必應 (當時櫻花排第6),而櫻花官網會註明邊一日公開練習唔可以簽名影相 (通常係比賽前一日)

勝利船︰同櫻花相若,本土球員亦係有求必應。本人在IG發現自8月中開始少人貼普度斯基合照,故推測普度斯基已開始耍大牌,應唔應酬球迷睇佢自己心情

三隊球員共通點係回應球迷多數點頭、微笑,說話以單字居多。

公開練習日數︰

飛腳︰每月不多於7日,不算頻密

櫻花︰幾乎每次練習都係公開

勝利船︰每星期2至3日,比飛腳多少少

總括而言,若去到關西區想係比賽以外同球員近距離接觸,櫻花練習場會係一個值得考慮既選擇。

 

 

 

鳥栖版主

日職波齡比較短,因受現場氣氛感染而愛上日職及鳥栖砂岩。希望能夠吸引更多朋友有興趣到日本現場看J League。有任何關於當地看J League的疑問也可以到Facebook找我!