2017.10.21 J League第30輪 神戶勝利船對鳥栖砂岩

最近鳥栖版主都比較懶,雖然間唔中都有去日本睇J League,不過返到黎都掛住返工,所以都一路都擺低左d遊記係度未打到出黎。打完呢篇應該都仲有2篇未打,不過我會盡快搞掂埋佢,比返個回憶自己啦同埋同大家開心些牙下。呢次旅程都主要因為呢場波而出發。前一日到步,呢日睇波,本身第二日就走 (最後因為打風關係推遲左一日先走到,仲要一落機就即刻返工真係諗起都癲)。

神戶勝利船球場唔算難去,所以今次都只係簡單介紹下。係三宮站轉地下鐵去御崎公園站,然後出站行5-10分鐘就可以去到球場。都係果句,落車唔識路都可以跟住d球迷行就得!

今次見到神戶既宣傳海報既球員係藤田直之,呢位前鳥栖砂岩既隊長。睇波既時候都見到有球迷會噓佢。不過我自己其實冇咩特別反感,果日仲特登著住印藤田直之既波衫去睇呢場波。

 

一路沿路行去球場都落緊雨,睇波其實都幾憎落雨,因為出入球場太多人,落雨都幾混亂下。不過神戶球場都比較先進,球場上蓋係可以閂既。

神戶d女仔都幾高質:P

由於都比較早開波既關係,加上作客波,所以今次鳥栖版主都只係早左45分鐘入場。但球場內既作客球迷遠超左版主既預期!所以最後都霸唔到咩好位,不過咁多球迷作客黎睇絕對係好事黎!

開波,上半場13分鐘就已經比神戶既大牌球員普度斯基走到個靚空位射入一球,諗住今場作客都係兇多吉少架啦。因為呢季兩次黎睇鳥栖作客都未贏過波兼一球不入…

但係,17分鐘伊巴布就單刀殺入禁區被高橋秀人推跌,12碼!最後都自己操刀射入,好快令呢場比賽重燃希望!然後38分鐘鳥栖砂岩既金敏赫再靠角球攻勢頂入一球,令鳥栖砂岩上半場已經反超前。

最後下半場互無紀錄下,鳥栖版主呢季終於首次現場睇到鳥栖砂岩贏波!

「We are Sagan We are Sagan We are Sagan!」

 

最後為大家送上當日比賽既精華。

鳥栖版主

日職波齡比較短,因受現場氣氛感染而愛上日職及鳥栖砂岩。希望能夠吸引更多朋友有興趣到日本現場看J League。有任何關於當地看J League的疑問也可以到Facebook找我!