[大阪睇波的抉擇]睇大阪飛腳定大阪櫻花好?

    有留意開足球既朋友就算唔係好熟悉J League,都可能會知道大阪係一山藏有二虎,有兩支唔同而又幾出名既球隊。而呢兩支球隊就分別係大阪飛腳同大阪櫻花,相信好多人都已經聽過佢地個大名,不過可能就唔係好清楚佢地既球員、歷史同戰績等等。而呢篇文章就會簡單介紹下兩隊,等想睇波既大家去大阪時知道更多!

歷史

    如果講歷史猶久既話,大阪櫻花就先贏一仗。大阪櫻花早係1957年已經成立,前身叫洋馬柴油機,果時就仲打緊日本足球聯賽JSL。不過果時JSL仲係業餘階段,去到1993年先正式有J League既出現。然後大阪櫻花係1994年取得JFL冠軍,然後於1995年升上J1聯賽。

    而大阪飛腳就係1980年成立,前身係松下電器足球部。係1993年開始既J League既創始10隊球隊既其中一隊。當時呢10隊就只係得大阪飛腳一隊關西球隊。

history

球隊名稱意思

    其實佢地兩隊球隊既名都唔係純粹因為好聽而改架,都有少少意思架。首先大阪櫻花係叫Cerezo Osaka,Cerezo係西班牙文解櫻花。櫻花係大阪既市花,亦都係一種好代表到日本既花,相信大家都會有d同感,如果親眼望過日本既櫻花都會覺得好靚。佢地既理念係成為一支將櫻花由大阪去到成為代表日本既球會,再係全世界取得好成績。亦都希望同佢地既球迷無論去到邊度都一齊成長!

    大阪飛腳就係Gamba Osaka,當中Gamba就係意大利文中既腳咁解。希望簡單咁追求實力,同時強調足球最重要既果樣野,「腳」。Gamba亦都食左日文入面加油「頑張る(Ganbaru)」既音。球隊希望無論咩情況下都可以爭取到勝利既球隊。希望成為日本以及世界第一既球會。

img_club_name_01

球隊位置

    雖然兩隊球隊都係位於大阪府,但係其實大阪飛腳並唔係大阪市內,而係係附近既吹田市,所以要比較既話,大阪飛腳係離市區比較遠,大阪櫻花好似係比較正統既大阪球隊。去大阪飛腳既球場需要先坐地鐵到千里中央或大日等既大阪單軌電車站再轉單軌去萬博紀念公園。而大阪櫻花就係大阪市內既長居站,如果由梅田、心齋橋或難波站去只係一條線就去到,真係非常方便。不過其實大阪飛腳都係要轉多程單軌,所以都唔係差好遠。大阪飛腳位處既萬博紀念公園亦有個新既大型商場中心Expocity落成,有齊商場、水族館、Pokemon Gym、Gundam Cafe等於一身,所以去睇波前或睇波後都可以去行下!而大阪櫻花附近都有個長居公園,裹面都有植物園、自然史博物館等,就比較有文藝氣息。不過就無大商場係附近。兩個地方附近都可以話各有千秋!而佢地所在既位置就大概如下圖:

gamba_cerezo

球隊成績

    最後再將兩隊既成績比較下啦。呢樣大家可能未睇之前都知邊隊成績會比較好架啦。大阪櫻花最好成績既一年就係2000年,佢地第1階段爭到去最尾一場,但最後都要屈居第2。2010年佢地都拎過第3位,跟住可以踢2011年既亞冠杯,而果屆亞冠杯佢地打到入8強,已經係日本球隊果屆既最好成績。但係佢地2014年再度降班,第3次要踢日乙。上年升班附加賽決賽佢地和左福岡黃蜂,但係因為排名高係附加賽有優勢,櫻花排第4而福岡排第3,所以佢地和都要出局。今年櫻花暫時都仲排緊第4,但仍有機會上頭兩名直接升班,而第3-6名都有附加賽爭一個升班位,所以可唔可以升返上J1都仲係存在住唔少既變數。

    雖然大阪飛腳係J League創立時10隊球隊之一,不過佢地一直都與冠軍無緣,要靠2002年西野朗監督上任後大打進攻足球,之後先係2005年既贏得第一階段冠軍及後再贏埋聯賽冠軍。然後去到2007年更加首次贏取聯賽杯。去到2008年更加贏埋亞冠杯做亞洲之癲!果段時間可以話係佢地最高峰既時期,可惜之後既世冠杯4強輸左比曼聯,最後只係拎到季軍。佢地係08,09同14,15年都試過兩次連續贏2屆天皇杯。

    不過佢地2012年只係排第17名,搞到要降落乙組。不過佢地2013年提早3輪已經篤定升班,最後仲拎埋日乙冠軍。升返上黎既2014年佢地即刻成為3冠王,包辦日職( J League)、日聯杯同天皇杯既冠軍!真係跌得低,但彈得更高!

( 原諒筆者呢度比較偏心,剩係貼左大阪飛腳既相,因為論成績大阪飛腳的確比較好。)

    大阪櫻花同大阪飛腳某程度上好似英超既球隊曼聯以及曼城,一對同市既宿敵。如果鐘意左其中一隊就會某程度上憎埋另外一隊。不過我地國外既球迷當然冇咁大既感覺啦,但千其唔好以為大家咁近就同市一家親既感覺。(雖然筆者都有著哂波衫又唱哂歌咁去過哂兩隊球隊既球迷區度睇波。)不過就唔好係球迷區show其他球隊既物品同盡量都打下氣啦。而筆者個人就比較喜歡大阪飛腳,除左因為成績比較好之外,現場睇過佢地2015年亞冠杯8強次回合戲劇性絕殺韓國球隊全北汽車真係好正!亦都再一次放呢段片出黎先~

    大阪呢兩隊球隊有唔少相反、敵對既地方,例如一隊位於大阪北邊,一隊位於大阪南邊、一隊以冷色系( 藍、黑色 )做主色,一隊就以暖色系( 粉紅 )做主色。如果兩隊係比賽中碰頭,氣氛都應該好正,到時你又會支持邊隊呢。所以真係好希望大阪櫻花能夠盡快升返上黎 J1,一季送返兩場大阪打比戰比球迷睇下!

鳥栖版主

日職波齡比較短,因受現場氣氛感染而愛上日職及鳥栖砂岩。希望能夠吸引更多朋友有興趣到日本現場看J League。有任何關於當地看J League的疑問也可以到Facebook找我!