[日本聯賽杯]12碼擊敗大阪飛腳 浦和紅鑽成聯賽杯改名Levain Cup後第一個冠軍

2016年既日本聯賽杯決賽就係10月15日係埼玉2002競技場舉行,由大阪飛腳對浦和紅鑽。

    準決賽大阪飛腳就憑住作客入球優惠擊退左橫濱水手,連續3年殺入聯賽杯既決賽。而正選就有守門員東口順昭,經驗豐富既中場今野泰幸同遠藤保仁。今次攞到新秀獎(New Hero)既井手口陽介亦都有份打正選,單箭頭就有艾迪美臣。

    而對面浦和紅鑽就爭取佢地相隔13年既聯賽杯冠軍。岩岩係日本國家隊回歸既西川周作、槙野智辛同柏木陽介都打返正選,前線就有4強第2回合大演帽子戲法既前鋒興梠慎三、中場武藤雄樹同高木俊幸組成。

    比賽開始後既第9分鐘,浦和紅鑽既關根貴大接應遠藤航傳既直線用左腳快射,不過守門員東口順昭都成功救到。對面既大阪飛腳就係17分鐘係後場搶到波後靠艾迪美臣憑佢身體質素壓住對方再憑自己既速度爆贏全部後衛後,單刀對住守門員西川周作輕鬆射入左下角。

大阪飛腳亦都係28分鐘右邊傳直線雖然中間既遠藤保仁有越位,但佢無做出進攻反應後漏比左邊既艾迪美臣後再次1對1對住門將西川周作,不過今次就被西川封到。落後一球既浦和紅鑽係36分鐘更因為宇賀神友彌既受傷,要換入駒井善成。不過44分鐘高木俊幸就帶住波由左邊cut入中間再用右腳射門,不過都係比東口順昭救到,上半場大阪飛腳暫時領先住1-0。

    下半場形勢就開始偏向浦和紅鑽方面。53分鐘關根貴大深入敵陣後作出射門但比東口救出,高木俊幸之後想再執雞都比大阪飛腳一眾防守球員殺出黎擋到。無咩攻勢既大阪飛腳就係66分鐘作出調動,由長澤駿入替入波既艾迪美臣。作為前線傳球既一個重點。67分鐘大阪飛腳都即刻有個反撃,大森晃太郎由左邊傳比倉田秋,但好可惜倉田秋右腳既射門比西川周作救出。

想追返球既浦和紅鑽就係76分鐘得嘗所願,岩岩後備入替既李忠成接應柏木陽介既角球,入黎第一下掂波就入波。

最後1比1既比數都維持到90分鐘要望入加時。加時101分鐘,左邊駒井傳個地波出黎比李忠成,但好可惜李忠成左腳一射高出。對面既大阪飛腳係120分鐘亦都有個黃金機會,藤本淳吾交個好靚既直線再由吳屋大翔右腳一射,可惜個波被西川周作改變左少少方向後中柱係白間線遊走,最後比防守球員成功解圍,要望入互射12碼階段。

係互射12碼階段中,兩隊既頭3名球員都成功射入,射先既大阪飛腳既第4個球員吳屋大翔既12碼就太正中比西川周作救到,而浦和紅鑽第4個射既李忠成同第5個遠藤航都射得入,成功贏得今屆既聯賽杯。

    而今次浦和紅鑽就係繼2003年後相隔13年拎佢地第二次既聯賽杯。而其實今屆既聯賽杯亦都因為贊助商轉左既關係,轉左做『J League YBC Levain Cup』,浦和紅鑽就成為改名後既第一支冠軍。佢地亦都係繼2006年J1冠軍後再奪冠。亦都係浦和紅鑽柏度域監督既第一個冠軍。而對面既大阪飛腳就繼上年後再一次係決賽輸波,成為聯賽杯既亞軍。

大阪飛腳 1-1(PK:4-5) 浦和紅鑽

原文:http://www.soccer-king.jp/news/japan/ync/20161015/504082.html?cx_cat=page1

 

鳥栖版主

日職波齡比較短,因受現場氣氛感染而愛上日職及鳥栖砂岩。希望能夠吸引更多朋友有興趣到日本現場看J League。有任何關於當地看J League的疑問也可以到Facebook找我!