[J League]東京睇波唔淨止得FC東京!

好耐無寫過介紹睇波既文章,呢排因為J League季尾,所以都寫得比較多J League既比賽情況。不過J League最正都係夠哂近,機程4個鐘到,但氣氛絕對拍得住歐洲各大聯賽。東京一直都係香港人既旅遊熱點,特別係近年廉航盛行 (筆者身為學生都係多得廉航先可以得閒去下日本睇波 ) ,所以若果本身鐘意足球既你去東京旅行時,可以留意下旅行期間有冇J League或者其他杯賽賽事,若果撞到下面介紹既其中一隊有主場賽事,可以入場睇返場波,感受下J League氣氛!

map

其實呢幾支球隊主場同東京既距離都差唔多,就算FC東京都其實唔屬於東京地鐵圈入面,都唔算太近。所以若果有幾隊有主場賽事既話,要選擇睇邊隊反而其實距離唔係最重要因素,可以睇下對邊隊有興趣,筆者比較建議睇柏雷素爾或者大宮松鼠。因為兩隊主場都比較細同近,氣氛更加正!橫濱水手有時都會係細場踢,可以留意下。

FC東京

第一隊就要介紹既緊係FC東京啦,係新宿坐京王線大約20分鐘就到飛田給站,再行5分鐘到就去到FC東京主場味之素球場架啦。

http://www.fctokyo.co.jp/

浦和紅鑽

有「日本紅魔」之稱既浦和紅鑽今季亦都拎左聯賽杯冠軍,季後賽亦都打入左決賽,不過佢地既主場埼玉2002球場都唔算太近,可以先坐地鐵南北線到尾站赤羽岩淵,然後轉琦玉高速鐵路到浦和美園,最後再沿住榮光大道行去球場。唔想行就可以坐去東浦和站,然後再轉20分鐘臨時球場巴士去球場。

http://www.urawa-reds.co.jp/

川崎前鋒

另一隊日本班霸球隊就位於東京下方,坐JR線21分鐘去到武藏小杉站後再行20分鐘或者轉5分鐘巴士就到。

http://www.frontale.co.jp/

橫濱水手

橫濱呢個地方都比較出名,係東京下面既一個港口城市。至於佢地主場日產足球場就先坐半個鐘多d既車去到新橫濱站,再行12-14分鐘就到。

http://www.f-marinos.com/

橫濱水手有時就會係另外一個較細既球場作賽。ニッパツ三ツ沢球技場( NHK Spring Mitsuzawa Football Stadium)

大宮松鼠

而大宮松鼠就係位於東京上少少既埼玉縣。由東京前往都係大約半個鐘到架咋。球場係大宮站行20分鐘或者轉巴士10分鐘就得,都唔算太遠。

http://www.ardija.co.jp/

柏雷素爾

位於柏市既柏雷素爾由東京前往都係同大宮差唔多,坐大約半個鐘車到柏站,然後行20分鐘或者轉巴士。

http://www.reysol.co.jp/

鳥栖版主

日職波齡比較短,因受現場氣氛感染而愛上日職及鳥栖砂岩。希望能夠吸引更多朋友有興趣到日本現場看J League。有任何關於當地看J League的疑問也可以到Facebook找我!