多摩川打比遊記 18/3/17

筆者大半年前靠朋友買到平機票,作為球迷去到日本又點可以唔入場睇J League?
上年機緣巧合下入左『ニッパツ三ツ沢球技場』睇三浦知良,今次咁岩就撞正多摩川打比,
支持我川人人有責,點可以唔睇呢?(好似係)

買飛好容易,事前決定好可以跟Comp2JP教學上網買 ,去到先諗就可以去便利店篤機

 

味之素票價基本下層自由席2300、3100,篤好晒類別同張數,部機會嘔張飛仔,交俾親切既店員,科水,等一陣就拎到飛。


交通方面,『味の素スタジアム』係新宿站坐京王線係飛田給落車行五至十分鐘就係,記得一定要睇清楚搭『快速』以上既列車,因為『飛田給站』係比賽日時,快速以上既班次都係會特別停車(平日唔會),如果傻更更上左各站停車既班次,大大話話成20個站我怕閣下開波都未落車,另外更加唔好上錯左京王新線,好似要轉車的。

一落車就會見到綠茵同FC東京既裝飾,老老豆豆筆者都係個日先知佢地係共用主場..

 

老麥都做左宣傳,老老豆豆香港波既Marketing幾時可以做到呢種程度…

 

如果買自由席要坐或者想去七仔買野既話,記得早少少去,筆者因為朋友記錯左以為睇3月19日(筆者:「聽日你自己落大阪睇飛腳啦」),係中野搞到近6點先出發去球場,7仔D飯團已經冇晒重大排長龍,期間重見到好多一家大細跑住入場,結果搞到1845先入到場,自由席已經冇晒位,同好多人一樣要企位,但無損球迷熱情,唔介意企兩個鐘既可以買最平既自由席,而想有位坐一係俾貴D一係早D入場,另外入場前有場刊賣,300羊一份,亦都有KFC。

 

『味の素スタジアム』筆者以為好似『ニッパツ三ツ沢球技場』咁觀眾席痴到好埋,原來都有段距離,不過個view都好好。

 

擰轉身行出去就係紀念品區,唔止一檔,筆者比較窮淨係買左條巾黎紀念一下。

 

成場波最驚訝既係球迷男女老幼都有,大部份應援席主導既野佢地都識做,筆者隔離有個好老既婆婆坐住輪椅,應該由佢女女既女士推住入黎,裝備都好齊全,對比起上次睇橫濱FC對櫻花既氣氛好好多,主場球迷既歌聲基本係冇停過,烏達卡仲好受歡迎,另外因為FC東京都係唱YOU WILL NEVER WALK ALONE,作為利迷既筆者瞬間濕晒,D打氣歌其實有D係其他球場或者直播都聽過,國際通用,唔怕既可以坐近少少球迷區一齊唱,不過筆者認真就覺得我川D打氣歌好聽少少,事後Google先知多摩川打比係有出CD….

場波黎講,我川一開波就差D把握東京門前混前入波,但除左呢個機會成場都係因為小球戰術受制於東京緊密既防守,靠零星突擊做到威脅,情況同亞冠作客東方個場類似,筆者睇左亞冠個場,對三好康兒同拉爾拿亞印象好深刻,但呢場波一個最後十幾分鐘先換出黎,一個冇上次打到咁前咁Sharp…

結果烏達卡不負所望一個入球一個助攻,加上我川一個Own Goal,FC東京3:0擊敗作客既川崎。

睇完呢場波最大既感受係足球深入社區之後既凝聚力真係好強…同埋人地真係好多女球迷。

唔知有生之年香港波做唔做到一半既程度?

下次再去既目標應該係我川主場或者櫻花主場,去到再同大家分享下!

最後附上當日既影片:

烏達卡之歌(好似係)

大久保嘉人入球後衝向FC東京球迷區慶祝片段

東京應援歌

 

球迷勁熱情!

鳥栖版主

日職波齡比較短,因受現場氣氛感染而愛上日職及鳥栖砂岩。希望能夠吸引更多朋友有興趣到日本現場看J League。有任何關於當地看J League的疑問也可以到Facebook找我!